Fréttir

Orti Egill Sonartorrek?

Klaus Johan MyrvollOrti Egill Sonatorrek? er yfirskrift erindis Klaus Johan Myrvoll, sem haldið verður í Háskóla Íslands, Odda stofu 101, fimmtudaginn 8. desember kl. 16. Fyrirlesturinn verður fluttur á norsku og er haldinn á vegum Stofnunar Árna Magnússonar í íslenskum fræðum og rannsóknarverkefnisins Samspil bragkerfis, hljóðkerfis og setningagerðar.

Í erindinu fjallar Myrvoll um um tímasetningu forníslensks kveðskapar og lýsir höfundur efni þess svo:

,,Mikið hefur verið deilt um hvort sá kveðskapur sem varðveittur er í íslenskum miðaldaritum sé raunverulega eftir þau skáld sem þar er greint frá. Þetta gildir sérstaklega um þau kvæði og lausavísur sem varðveitt eru í Íslendinga sögum en einnig hafa efasemdir komið fram um einstök kvæði í konungasögum. Fræðimenn hafa tekið fjölbreytilega afstöðu til málsins. Ein skoðun er að vitnisburður heimildanna sé í flestum tilfellum réttur (svo t.d. Finnur Jónsson) en önnur að mikið hafi verið ort inn í sögurnar um leið og þær voru samdar (svo t.d. Bjarni Einarsson). Þau rök sem fram hafa komið beinast fyrst og fremst að málsögulegum og stílfræðilegum atriðum.

Í doktorsverkefni mínu reyni ég að feta aðra og hlutlægari leið, með því að nýta bragfræðileg auðkenni til að greina kvæðin í mismunandi aldurslög. Auðkenni af þessu tagi eru meðal annars ólík áherslumynstur og notkun og staðsetning hendinga. Í erindinu verða bragfræðileg rök kynnt og sýnt hvernig þau nýtast til að tímasetja kvæði. Þar næst verður farið gaumgæfilegar yfir tvö tiltekin auðkenni í samhengi við tiltekið efni: Annars vegar mismunandi áherslumynstur í kviðuhætti (sem hefur m.a. afleiðingar fyrir tímasetningu Ynglingatals og Sonatorreks) og hins vega breytingar í notkun hendinga á níundu og tíundu öld."

Klaus Johan Myrvoll vinnur að doktorsritgerð um dróttkvæði við háskólann í Ósló. Hann hefur í haust verið fræðimaður á Stofnun Árna Magnússonar í íslenskum fræðum.


Til baka



Senda Senda Prenta Prenta Senda á Facebook

Leitað að verki

Höfundur:
Ritverk:


Skipta um leturstærð


Tungumál