Fréttir

Stríðsminningar í bókmenntum - hádegisfyrirlestur
Á morgun, þriðjudag, halda Daisy Neijmann og Gunnþórunn Guðmundsdóttir fyrirlestur í hádegisfundaröð Sagnfræðingafélags Íslands, en röðin ber yfirskriftina Hvað eru minningar?

Fyrirlesturinn mun skýra frá samanburðargreiningu á bókmenntalegri tjáningu á tráma, minni og gleymsku í kjölfar félagslegrar kreppu og fjalla um hlutverk bókmennta í sameiginlegum skilningi á fortíðinni og viðleitni til að knýja fram félagslegt uppgjör. Fjallað verður um kenningar um tráma, um minnissprenginguna svokölluðu og hugmyndir um minni og gleymsku. Skoðaðir verða bókmenntatextar sem taka á afleiðingum sögulegra umbreytinga, félagslegrar spennu og trámatískra áfalla, frá tveimur ólíkum löndum (Spáni og Íslandi) í ljósi minnis- og trámakenninga.

Daisy Neijmann er stundakennari við Háskóla Íslands og rannsakandi hjá Eddu- Öndvegissetri. Gunnnþórunn Guðmundsdóttir er dósent í almennri bókmenntafræði við Háskóla Íslands. Þær vinna að rannsóknarverkefni sem ber nafnið: Minni og gleymska: Rof, eyður og sjálfsmynd þjóðar og er styrkt af Eddu-Öndvegissetri.

Erindið verður haldið á Þjóðminjasafni Íslands á morgun, þriðjudaginn 21. febrúar og stendur frá 12.05 til 13.00.

Aðgangur er ókeypis og öllum opinn.


Til baka



Senda Senda Prenta Prenta Senda á Facebook

Leitað að verki

Höfundur:
Ritverk:


Skipta um leturstærð


Tungumál