Fréttir

Höfundakvöld í Norræna húsinu

IðrunDanski rithöfundurinn Hanne-Vibeke Holst kemur fram á höfundakvöldi í Norræna húsinu að kvöldi miðvikudagsins 20. febrúar, kl. 20.

Hún heimsækir lesendur sína á Íslandi í tilefni þess að nýjasta bók hennar, ættar- og spennusagan Iðrun, er nýkomin út hér á landi hjá Forlaginu og hefur verið geysilega vel tekið. Það er þýðandi hennar, Halldóra Jónsdóttir, sem talar við Hanne-Vibeke og fer samtalið fram á dönsku. Eftir spjall þeirra Halldóru gefst gestum sjálfum tækifæri til að spyrja höfundinn spjörunum úr og fá áritun á bækur sínar.

Hanne-Vibeke Holst (f. 1959) er menntaður blaðamaður en var nýorðin tvítug þegar fyrsta bók hennar kom út, unglingabókin Hejsa Majsa. Síðan hefur hún gefið út fjölda bóka fyrir unglinga og fullorðna, greinasöfn og viðtalsbækur, en langþekktust er hún fyrir skáldsögur sínar, þríleikinn um fréttamanninn Therese Skårup, Thereses tilstand (1992), Det virkelige liv (1994) og En lykkelig kvinde (1998), og pólitísku spennusögurnar Kronprinsessen (2002, á íslensku 2005), Kongemordet (2005) og Dronningeofret (2008).

Hanne-Vibeke hefur fengið fjölda viðurkenninga og verðlauna fyrir bækur sínar, einkum síðastnefnda þríleikinn. Allar bækur hennar eru til í bókasafni Norræna hússins og fást þar að láni ásamt dvd myndum sem gerðar voru eftir ofangreindum pólitískum spennusögum hennar.

Viðburðurinn er öllum opinn og ókeypis aðgangur.


Til baka



Senda Senda Prenta Prenta Senda á Facebook

Leitað að verki

Höfundur:
Ritverk:


Skipta um leturstærð


Tungumál