Fréttir

Hvernig verður bók til? – Jójó og Fyrir Lísu

Fyrir Lísu eftir Steinunni SigurðardótturHádegisfyrirlestraröðin Hvernig verður bók til heldur áfram göngu sinni, ótrauð og óbilandi. Það eru Námsbraut í ritlist við Háskóla Íslands og Bókmennta- og listfræðistofnun sem standa að röðinni. Fimmtudaginn 7. mars næstkomandi fjallar Steinunn Sigurðardóttir um tvær nýjustu skáldsögur sínar, Jójó og Fyrir Lísu. Um leið og Steinunn Sigurðardóttir fer yfir sköpunarsögu skáldsaganna tveggja, kemur hún einnig inn á tengslin við íslenskan veruleika og nýlegar afhjúpanir um kynferðisbrot, gegn drengjum sérstaklega. 

Hvaða erindi eiga tveir Berlínarbúar, þýskur geislalæknir og franskur róni, sem aðalpersónur í íslenska skáldsögu?  Hvernig datt Steinunni Sigurðardóttur í hug - eftir að hafa sent frá sér Reykjavíkurskáldsögur með ívafi ljóða eins og Tímaþjófinn og Sólskinshest, íslenska ferðasögu fjögurra kvenna, eins og Hjartastað - að fjalla um sameiginlega lífsreynslu og vináttu Martins læknis og Martins róna í Berlín? En þeir reynast vera þjáningarbræður sem glíma báðir við afleiðingar af því að hafa verið gert mein þegar þeir voru börn. 

Steinunn Sigurðardóttir á að baki langan og glæsilegan höfundarferil, en fyrsta bók hennar,  ljóðabókin Sífellur, kom út 1969.  Nýjasta ljóðabók hennar, Ástarljóð af landi, var þýdd á þýsku og frönsku og ljóð eftir hana hafa birst í tímaritum og safnbókum á mörgum tungumálum, nú síðast á japönsku.

Steinunn stígur í pontu og/eða á stokk og/eða fram fyrir skarann fimmtudaginn 7. mars kl. 12.00, á Háskólatorgi. Allir eru velkomnir.


Til baka



Senda Senda Prenta Prenta Senda á Facebook

Leitað að verki

Höfundur:
Ritverk:


Skipta um leturstærð


Tungumál