Fréttir

Nýræktarstyrkir MÍB

Fimmtudaginn 30. maí  tilkynnti Illugi Gunnarsson, mennta- og menningarmálaráðherra, hverjir hlytu Nýræktarstyrki Miðstöðvar íslenskra bókmennta árið 2013. Athöfnin fór fram í Gunnarshúsi, húsi Rithöfundasambands Íslands að Dyngjuvegi 8 í Reykjavík.

Nýræktarstyrkir eru veittir einu sinni á ári og þeim er ætlað að hvetja til útgáfu á nýjum íslenskum skáldskap. Á meðal þeirra sem fengið hafa Nýræktarstyrki eru Bryndís Björgvinsdóttir, fyrir handrit að barnabókinni Flugan sem stöðvaði stríðið og Hildur Knútsdóttir fyrir handrit að sinni fyrstu skáldsögu Slætti, auk þess hefur áður hlotið styrkinn Sigurlín Bjarney Gísladóttir en hún sendi frá sér ljóðabókina Bjarg fyrr á árinu. Í fyrra hlaut einnig Nýræktarstyrk Dagur Hjartarson, en hann hreppti einnig bókmenntaverðlaun Tómasar Guðmundssonar á síðasta ári fyrir ljóðabókina Þar sem vindarnir hvílast.

Í ár bárust 49 umsóknir um Nýræktarstyrki og hljóta að þessu sinni fjórir styrk að upphæð 250.000 kr. Umsóknum um Nýræktarstyrki hefur fjölgað töluvert frá því að þeim var fyrst úthlutað úr Bókmenntasjóði árið 2008, en þá bárust 9 umsóknir og 5 styrkir veittir, hver að upphæð 200 þúsund, árið eftir, 2009, bárust 27 umsóknir og hlutu 6 styrki, árið 2010 bárust 39 umsóknir og voru 5 styrkir veittir og árið 2011 bárust 30 umsóknir um úthlutað 5 styrkjum. Árið 2012, bárust 23 umsóknir um aftur voru 5 styrkir veittir að upphæð 200.000 kr.

Nýræktarstyrki hljóta að þessu sinni eftirfarandi verk og höfundar:

Crymogæa

Skáldsaga
eftir Alexander Dan Vilhjálmsson.

Umsögn um verk og höfund:

Með traustri þekkingu á íslenskri bókmenntahefð og erlendum fantasíum skapar höfundur nýstárlega íslenska furðusögu sem er borin uppi af ríkri málvitund, frumleika, hugkvæmni og orðheppni þess sem leitar Íslandi samastað í heimi fantasíu um byltingarfólk huga og veruleika.

 

Vince Vaughn í skýjunum

Sögur
eftir Halldór Armand Ásgeirsson

Umsögn um verk og höfund:

Á írónískan og gráglettinn hátt yrkir höfundur um átök og árekstra hins tæknivædda heims við gamalkunnar hefðir og siði. Hér rekst manneðlið á við kerfið, einlægni togast á við yfirborðsmennsku og furður gera flatneskjunni lífið leitt í sögum sem samdar eru af stílkunnáttu, hugkvæmni og húmor.

 

Leyniregla Pólybíosar

Barna- og unglingasaga
eftir Roald Eyvindsson

Umsögn um verk og höfund:

Með því að sækja næringu í þjóðlegan fróðleik og riddarasögur og tengja við þann arf sem leynist í sögum Enid Blyton skapar höfundur fjörugt og spennandi verk. Það státar af fræðilegu gildi og ágætri frásagnargáfu, yfir því er æskuandi og yfirsýn manns sem þekkir sögu okkar og vill miðla henni til barna og unglinga.

 

Innvols

Smásögur, ljóð og prósi
eftir Herthu Richardt Úlfarsdóttur, Kötlu Ísaksdóttur, Valdísi Björt Guðmundsdóttur, Guðrúnu Heiði Ísaksdóttur, Bergþóru Einarsdóttur, Selmu Leifsdóttur, Þórunni Þórhallsdóttur, Elínu Ósk Gísladóttur, Nönnu Halldórsdóttur og Maó.

Umsögn um verk og höfund:

Í meitluðum textum sameina tíu konur raddir sínar í einu verki þar sem fáguð ljóðræna og hvassyrt snerpa takast á. Textar þeirra eru kjarnyrtir og fjörugir, þær sýna vald sitt á margvíslegu formi og stílbrögðum og varpa með skáldskap sínum ljósi á hugarheim ungra kvenna og sýn þeirra á samfélagið.


Til baka



Senda Senda Prenta Prenta Senda á Facebook

Leitað að verki

Höfundur:
Ritverk:


Skipta um leturstærð


Tungumál