Fréttir

Ljóðstafurinn er Antons Helga

Úrslit voru tilkynnt í Ljóðstaf Jóns úr Vör, árlegri ljóðasamkeppni Kópavogsbæjar, nú á þriðjudag. Verðlaunin, ljóðstafinn sjálfan, hlaut Anton Helgi Jónsson, en hann sigraði áður í keppninni árið 2009.

Sex önnur ljóð fengu sérstaka viðurkenningu, þar á meðal ljóðið „Föstudagur á Miklubraut“ sem Anton Helgi orti einnig. Ljóð sem send eru í keppnina eru merkt með dulnefni.

Sigurljóðið, „Horfurnar um miðja vikuna“, er eftirfarandi:

Horfurnar um miðja vikuna

Það er bara miðvikudagur
enn getur allt gerst
enn er von

enn má finna rétta taktinn
finna sinn hljóm
jafnvel finna sig í góðu lagi

allt getur gerst

meðan enn leynist bílskúr
baka til í hausnum á mér
og band
sem djöflast frameftir

Í dómnefnd Ljóðstafsins sátu Sindri Freysson, skáld og rithöfundur, Jón Yngvi Jóhannesson, bókmenntafræðingur, og Gunnþórunn Guðmundsdóttir, bókmenntafræðingur og dósent við Háskóla Íslands. Rökstuðningur dómnefndar hljóðar svo:

„Ljóðið sem hreppti fyrsta sætið ber titilinn „Horfurnar um miðja vikuna“ , ljóð sem vakti athygli allra dómnefndarmanna við fyrsta lestur og vinnur á við nánari kynni. Ljóðið er ort af snerpu og þrótti af skáldi sem hefur nútímalegt ljóðmál fullkomlega á valdi sínu.

Í ljóðinu er gefin í skyn hliðstæða með mannsævinni annars vegar og dögum vikunnar hins vegar. Á miðvikudegi horfir miðaldra ljóðmælandi til framtíðar og þótt hann hafi ekki enn fundið sig til fulls er hann fullur bjartsýni og undirstrikar þá glaðbeittu lífsgleði sem ljóðið miðlar með því að sækja lokamyndina til unglingsáranna þar sem bílskúrsband „djöflast frameftir“ í höfði hans.

Bygging ljóðsins er markviss og þótt ljóðmálið sé einfalt byggir það á snjallri notkun endurtekninga og óreglulegrar stuðlasetningar  sem magna upp hrynjandi í ljóðinu, tónlist með undirliggjandi rokktakti sem kallast á við myndina í lokaerindinu.“

Við sama tilefni voru veitt verðlaun í ljóðasamkeppni grunnskóla Kópavogs. Þar var efstur á blaði Patrik Snær Eiríksson úr Hörðuvallaskóla með ljóðið „Næturhiminn“.


Til baka



Senda Senda Prenta Prenta Senda á Facebook

Leitað að verki

Höfundur:
Ritverk:


Skipta um leturstærð


Tungumál