Fréttir

Engjahlauparinn sigraði í ljóðaslammi

Brynjar JóhannessonSjöunda ljóðaslamm Borgarbókasafns var haldið í sjöunda skipti á Safnanótt, föstudaginn 7. febrúar 2014. Þema keppninnar var af öllu hjarta.

Keppnin var að venju haldin á aðalsafni Borgarbókasafns, Tryggvagötu 15.

Alls kepptu tíu atriði til sigurs, og hver hópur, hvert tvíeyki og hver einstakur slammari nálgaðist þema kvöldsins með sínum hætti – og með sinni eigin frjálsu aðferð. Úrslit kvöldsins voru þessi:

Í fyrsta sæti var Engjahlauparinn eftir Brynjar Jóhannesson. Brynjar braust um í afmörkuðum ramma stóls þess, sem hann settist á í byrjun atriðisins, en að mati dómara var textinn skýr og spennandi og öryggi í flutningnum, og þegar leið á atriðið byggðist upp spenna sem hreif alla með sér:

Í öðru sæti var atriðið Pungur Silungs, en þar voru hnefaleikar og ljóðlist sameinuð á afar nýstárlegan máta. Flytjendurnir voru þau Aron Daði Þórisson og Marína Gerða Mantel, og Marína lét höggin dynja af fullum þunga á Aroni á meðan hann flutti ljóðið.

í þriðja sæti var Guðný Þóra Guðrúnardóttir, hún sagði sögu af heimsókn í Anne Frank safnið í Amsterdam og vann áhorfendur og dómnefnd á sitt band með einlægnina að vopni.

Aðrir keppendur voru þau Jóhann Björnsson og kompaní, sem fluttu atriðið Fyndið / dapurt; Valgerður Þóroddsdóttir og ókynntur harmonikkuleikari sem fluttu Borgarbrim; Eðvarð Freyr Ingólfsson og félagar áttu atriðið Vonlaus rómantík; Ágúst Már Guðjónsson flutti Nágrannastelpuna; þríeykið Veirumenn fluttu atriðið Veirumenn í G, fyrsti þáttur: 600 bar; Arnór Stefánsson flutti ljóðið Hversdagslegar hugsanir undir eigin gítar- og munnhörpuleik; og síðastur á svið var Bragi Björn Kristinsson með ljóðið Andskotans óður.

Dómnefnd skipuðu þau Andri Már Enoksson, tónlistarmaður; Bragi Ólafsson, rithöfundur; Davíð Kjartan Gestsson, bókmenntafræðingur; María Þórðardóttir, leikkona; og Ragnheiður Eiríksdóttir, tónlistarkona og formaður dómnefndar.

Í dómarahléi spiluðu sigurvegarar slammsins árið 2013, hljómsveitin Kælan mikla. Kælan var stofnuð til þátttöku í þeirri keppni, og fagnaði því svo að segja eins árs afmæli um leið.

Fimm manna dómnefnd valdi þrjú bestu atriðin. Í henni sátu fyrir hönd Borgarbókasafns María Þórðardóttir leikkona og fyrir hönd Reykjavíkur bókmenntaborgar UNESCO Davíð Kjartan Gestsson bókmenntafræðingur. Auk þeirra Andri Már Enoksson tónlistarmaður, Bragi Ólafsson rithöfundur, og Ragnheiður Eiríksdóttir tónlistarkona og formaður dómnefndar.
 
Kynnir kvöldins var Anna Svava Knútsdóttir.

Ljósmyndir úr keppninni og upptökur af siguratriðunum er að finna á heimasíðu Borgarbókasafns.


Til baka



Senda Senda Prenta Prenta Senda á Facebook

Leitað að verki

Höfundur:
Ritverk:


Skipta um leturstærð


Tungumál