Fréttir

Raddlaus börn í ábyrgðarhlutverkum

MARK Miðstöð margbreytileika- og kynjarannsókna og RBF Rannsóknastofnun í barna- og fjölskylduvernd efna til málstofu í Lögbergi stofu 101 kl. 12-13:30 fimmtudaginn 3. apríl n.k um nýútkomna bók Bjargar Guðrúnar Gísladóttur, Hljóðin í nóttinni – Minningasaga. Á bókarkápu segir að bókin geymi:

„Átakanlegar örlagasögur sem mótuðu líf lítillar stúlku og foreldra hennar á sjöunda áratug síðustu aldar. Hörð lífsbarátta í eymd og niðurlægingu í Höfðaborginni í Reykjavík. Og sársaukafullt uppgjör við margt af því ljótasta sem lífið hefur upp á að bjóða“.

Bókin hefur vakið mikla athygli og hefur Björg lagt fram mikilvægan skerf til umræðunnar um börn sem hafa verið beitt ofbeldi í uppvexti sínum og búið við ofbeldi í sínu nánasta umhverfi. Saga Bjargar gerist á síðari hluta 20. aldar og vekur bókin upp áleitnar spurningar um hvernig staða þessara mála er í dag. Hvernig er kerfið í stakk búið til að bregðast við þessum málum í dag? Hvaða viðhorf eru ríkjandi meðal almennings og hvernig hafa þau áhrif? Hvað hefur breyst frá þeim tíma sem Björg greinir frá í bók sinni?

Á málþinginu mun höfundur lesa valda kafla úr bókinni. Í kjölfarið verða pallborðsumræður um bókina og hlutskipti barna sem eru fórnarlömb heimilisofbeldis og  kynferðislegs ofbeldis. Í pallborði sitja: Anni G. Haugen lektor í félagsráðgjöf við HÍ og sérfræðingur í barnavernd og kynbundnu ofbeldi. Ingólfur V.Gíslason, lektor í félagsfræði við HÍ og sérfræðingur í karlmennsku og ofbeldi og Guðrún Jónsdóttir talskona Stígamóta, grasrótarsamtaka sem berjast gegn kynferðisofbeldi.

Fundarstjóri er Hallfríður Þórarinsdóttir, forstöðumaður MARK.

Málþingið verður haldið í Háskóla Íslands, Lögbergi stofu 101, frá 12-13:30.

Málþingið er öllum opið.


Til baka



Senda Senda Prenta Prenta Senda á Facebook

Leitað að verki

Höfundur:
Ritverk:


Skipta um leturstærð


Tungumál