Vilborg Davíðsdóttir fæddist 3. september 1965 á Þingeyri við Dýrafjörð. Hún lauk stúdentsprófi frá Menntaskólanum á Ísafirði 1984 og lagði stund á ensku við Háskóla Íslands veturinn 1985-1986. Hún lauk prófi í hagnýtri fjölmiðlun frá Háskóla Íslands árið 1991 og BA prófi í þjóðfræði árið 2005. Vilborg starfaði sem blaðamaður, dagskrárgerðarmaður og fréttakona á hinum ýmsu fjölmiðlum frá árinu 1985 til ársins 2000 en hefur síðan þá helgað sig ritstörfum og þýðingum, auk þess sem hún leggur nú stund á meistaranám í þjóðfræði við Háskóla Íslands.

Fyrsta bók hennar, skáldsagan Við Urðarbrunn, kom út árið 1993 og framhald hennar, Nornadómur, árið eftir. Þær gerast um aldamótin 900 og segja frá baráttu ambáttarinnar Korku Þórólfsdóttur fyrir betra lífi og fylgja henni eftir úr ánauð á Íslandi til Heiðabæjar í Danmörku og heim aftur um Suðureyjar og Orkneyjar til frelsis og landnáms á Vestfjörðum. Við Urðarbrunn hlaut verðlaun Íslandsdeildar IBBY 1994 og ári síðar fékk framhaldsbókin, Nornadómur, verðlaun Skólamálaráðs Reykjavíkur.

Bækurnar voru endurútgefnar árið 2001 í einni bók undir titlinum Korku saga. Þær hafa notið mikilla vinsælda og verið notaðar við kennslu í grunn- og framhaldsskólum um land allt.

Þriðja bók Vilborgar er Eldfórnin (1997), söguleg skáldsaga sem byggir á atburðum sem urðu í Kirkjubæjarklaustri á 14. öld þegar nunna var brennd þar á báli, og sú fjórða Galdur (2000) sem sömuleiðis byggir á sögulegum atburðum og gerist í Skagafirði á 15. öld þegar Englendingar réðu lögum og lofum á Íslandi.

Árið 2002 kom út þýðing Vilborgar á skáldsögunni The Hiding Place eftir bresku skáldkonuna Trezza Azzopardi, undir titlinum Felustaðurinn.

Fimmta skáldsaga hennar, Hrafninn (2005), er byggð á heimildum um lífshætti inúíta og norrænna manna á Grænlandi um miðja 15. öld og örlögum byggðanna sem stofnað var til þar af landnámsfólki frá Íslandi um 1000. Hrafninn var tilnefndur árið 2005 til Íslensku bókmenntaverðlaunanna.

Sjötta bók Vilborgar, Auður, kom út árið 2009 og fjallar um landnámskonuna Auði djúpúðgu Ketilsdóttur. Þroskasaga Auðar er sögð um leið og dregin er upp mynd af þeim róstusömu tímum þegar norrænir menn lögðu undir sig eyjarnar við Skotland og herjuðu í Vesturhafi. Bókin var tilnefnd til Íslensku bókmenntaverðlaunanna.

Vilborg hefur skrifað ýmsar greinar í bækur og blöð; meðal annars ,,Konurnar í Kirkjubæ og veruleiki klausturlífsins“ í bókinni Af klaustrum og kennimönnum í Skaftafellsþingi (1999) og ,,Elves on the Move: Midwinter Mumming and House-Visiting Traditions in Iceland“ í bókinni Masks and Mumming in the Nordic Area (2007).

Hún hlaut viðurkenningu Rithöfundasjóðs Íslands fyrir ritstörf árið 1994 og viðurkenningu úr Bókasafnssjóði höfunda árið 2003 og tók þátt í Bókmenntahátíðinni í Reykjavík árið 2005.

Við Urðarbrunn og Nornadómur komu út í færeyskri þýðingu árin 2003 og 2004 og skáldsögurnar Eldfórnin (Das Feueropfer) og Galdur (Der Liebeszauber) voru gefnar út á þýsku hjá Bertelsmann btb sömu ár. Hrafninn er væntanlegur í þýskri þýðingu hjá sama forlagi.

Forlag: Mál og menning.

Mynd af höfundi: Jóhann Páll Valdimarsson.


Til baka


Senda Senda Prenta Prenta Senda á Facebook

Leitað að verki

Höfundur:
Ritverk:

Umfjöllun um bækur

Upplestur

Auður (51,79 MB) – Brot

Hrafninn (65,78 MB) – Brot



Skipta um leturstærð


Tungumál