Guðrún Helgadóttir fæddist í Hafnarfirði þann 7. september 1935 og ólst hún þar upp í stórum systkinahópi. Hún starfaði sem ritari við Menntaskólann í Reykjavík frá 1957-1967 og sem deildarstjóri hjá Tryggingastofnun ríkisins frá 1973-1980. Guðrún var fulltrúi Alþýðubandalagsins í Borgarstjórn Reykjavíkur frá 1978-1982 og alþingismaður frá 1979-1995. Hún var forseti Alþingis 1988-1991, fyrst kvenna til að gegna því embætti.

Fyrsta bók Guðrúnar, Jón Oddur og Jón Bjarni, kom út árið 1974 en hún er fyrsta bókin af þremur um þessa uppátektasömu tvíburabræður. Allar hafa þær verið endurútgefnar mörgum sinnum og gerð hefur verið kvikmynd byggð á sögunum. Guðrún er einn þekktasti núlifandi barnabókahöfundur á Íslandi og hafa bækur hennar verið þýddar á fjölmörg tungumál. Hún hlaut Norrænu barnabókaverðlaunin árið 1992 fyrir bók sína Undan illgresinu, var tilnefnd til H.C. Andersen verðlaunanna 1988 og hefur auk þess fengið ýmis verðlaun og viðurkenningar fyrir verk sín á Íslandi, meðal annars var bókin Öðruvísi fjölskylda tilnefnd til Íslensku bókmenntaverðlaunanna 2004. Árið 2005 hlaut hún Verðlaun Jónasar Hallgrímssonar fyrir framlag sitt til íslenskrar tungu.

Guðrún skrifar aðallega fyrir stálpuð börn en hefur einnig sent frá sér nokkrar myndabækur fyrir yngri börn með myndskreytingum eftir þekkta listamenn. Hún hefur sent frá sér eina skáldsögu og sjónvarpsleikrit fyrir fullorðna. Leikrit hennar Óvitar var frumflutt í Þjóðleikhúsinu 1979 og hefur einnig verið sett á svið í Færeyjum og Noregi.

Guðrún er búsett í Reykjavík.

Forlag: Vaka-Helgafell.


Til baka


Senda Senda Prenta Prenta Senda á Facebook

Leitað að verki

Höfundur:
Ritverk:


Skipta um leturstærð


Tungumál