R. L. Stine

Bókabeitan hefur komið sterk inn á undanförnum árum í að leggja sitt af mörkum til að auka fjölbreytileika í útgáfu barna- og unglingabóka á Íslandi. Nú koma út á hennar vegum þrjár þýðingar úr Hrolls bókaflokknum, eða Goosebumps á ensku, eftir hinn vinsæla og afkastamikla hrollvekjuhöfund R. L. Stine, sem hefur stundum verið kallaður Stephen King barnabókanna. Goosebumps bókaflokkarnir telja í heild eitthvað um 120 bækur. Hefnd garðdverganna og Sá hlær best sem síðast hlær eru þýðingar á bókum úr fyrsta Goosebumps bókaflokknum, en í honum eru samtals heilar 62 bækur!