Andri Snær Magnason, Sjón og Guðbjörg Kristjánsdóttir verðlaunuð
Íslensku bókmenntaverðlaunin voru afhent fimmtudaginn 30. janúar við hátíðlega athöfn á Bessastöðum.
Andri Snær Magnason hlaut verðlaunin í nýjum flokki barna- og unglingabóka fyrir skáldsöguna
Tímakistuna, sem gefin er út af Máli og menningu. Þess má geta að þetta er í þriðja sinn sem Andri Snær fær verðlaunin og er hann jafnframt fyrstur til að hljóta þau í öllum flokkum, en fyrir hafði hann fengið verðlaunin í flokki fagurbókmennta fyrir
Söguna af bláa hnettinum árið 1999 og í flokki fræðirita fyrir
Draumalandið árið 2006.
Sjón hlaut verðlaunin í flokki fagurbókmennta fyrir skáldsöguna
Mánastein, sem gefin er út af JPV. Guðbjörg Kristjánsdóttir fékk verðlaunin í flokki fræðirita og bóka almenns efnis fyrir
Íslensku teiknibókina sem Crymogea gefur út.
Forseti Íslands, Ólafur Ragnar Grímsson, tilkynnti val lokadómnefndar á verðlaunahöfum. Fjögurra manna lokadómnefnd valdi verkin úr hópi fimmtán bóka sem tilnefndar voru til verðlaunanna í desember á síðasta ári. Lokadómnefnd var skipuð þeim Guðna Kolbeinssyni, Þorgerði E. Sigurðardóttur, Þóru Arnórsdóttur og Stefaníu Óskarsdóttur, sem var jafnframt var formaður nefndarinnar. Smellið
hér fyrir yfirlit tilnefndra bóka.
