Slegið verður til hátíðar 23. til 24. nóvember í Norræna húsinu þar sem furðusögur og skyldar bókmenntir verða í hávegum hafðar. Það er Íslenska furðusagnafélagið sem stendur að hátíðarhöldunum, en verslunin Nexus og útgáfufélagið Rúnatýr eru aðalstyrktaraðilar hátíðarinnar. „Markmið hátíðarinnar er fyrst og fremst að vekja athygli á þessum bókmenntageira og opna fyrir umræðuna um hann,“ segir í fréttatilkynningu aðstandenda hátíðarinnar, „enda er mikil furðusagnabylgja að hefjast í íslenskum bókmenntaheimi.“ Boðið verður upp á fjölbreytta dagskrá þar sem ýmsir höfundar furðusagna, hvort sem um ræðir vísindaskáldskap, fantasíur eða gufupönk, munu lesa upp. Einnig verða fyrirlestrar á fræðilegri nótum þar sem Ármann Jakobsson talar um árdaga íslensku vísindaskáldsögunnar og Björn Þór Vilhjálmsson mun ræða þýðingar á hryllingsögum bandaríska höfundarins H.P. Lovecraft, meðal annarra. Aðstandendur hátíðarinnar eru Þorsteinn Mar, útgefandi og rithöfundur, og sigurvegarar íslensku barnabókaverðlaunana 2012, þeir Kjartan Yngvi Björnsson og Snæbjörn Brynjarsson.