Bókmenntahátíðin í Reykjavík er handan við hornið og þar kennir ýmissa grasa. Sautján rithöfundar hvaðanæva að úr heiminum sækja þá Bókmenntaborgina heim, bókelskum íbúum og gestum hennar til ómældrar ánægju. Á meðal rithöfunda á hátíðinni er pólska ljóðskáldið Ewa Lipska, en koma hennar til Íslands er hluti af pólsk-íslenska ljóðlistarverkefninu ORT. Ewa Lipska, fædd árið 1945 í Kraká, er á meðal virtustu ljóðskálda Póllands og hefur unnið til fjölda bókmenntaverðlauna. Þó fæðingarár og útgáfutími fyrstu bókar hennar (Wiersze, 1967) gefi til kynna að hún teljist til skálda pólsku „nýbylgjunnar“ svokölluðu hefur Ewa aldrei talið sig tilheyra sérmerktum hópi eða kynslóð listamanna og hefur hún á markvissan hátt sýnt fram á að ekki er hægt að draga hana í listræna dilka. Ljóð hennar eru umfram allt persónuleg, þó í þeim megi einnig greina pólitískar víddir, þar sem hún afhjúpar áróðursorðræður og beinir um leið sjónum að vanköntum tungumálsins sem skyn- og tjáskiptatæki. Ljóð hennar hafa verið þýdd á fjölda tungumála og birtust á íslensku í þýðingu Geirlaugs Magnússonar árið 1993 (Í Andófinu: safn pólskra nútímaljóða). Ewa Lipska mun taka þátt í höfundaspjalli í Norræna húsinu 11. September á Bókmenntahátíð í Reykjavík og lesa upp úr verkum sínum 15. September. Frekari upplýsingar um dagskrá Bókmenntahátíðar má nálgast á heimasíðu hennar.
ORT: Ewa Lipska á Bókmenntahátíð í Reykjavík
