Teikningar eftir Jóhann L. Torfason
Úr Ávöxtum:
Appelsínur
Þær eru á borðinu í djúpri skál.
Þangað til þú birtist snerti ég ekki
á þeim því þær eru handa þér.
Stundum kemurðu hingað með fangið
fullt af fuglum. Það er fremur
óheppilegt því íbúðin okkar er lítil.
Loks bankarðu laust.
Appelsínur! Risastórar blóðappelsínur!
Hróparðu glaðlega.
Ég opna ekki. Tek fyrir eyrun og grúfi
mig ofan í ávaxtaskálina. Heyri þig
ganga brott og veit að þú kemur ekki
aftur, þó svo bergmáli í eyrum mínum:
Appelsínur, appelsínur ...
