Um bókina:
Ekki fer milli mála að síðasta öld hafi verið mesta framfaraskeið í sögu mannkyns, öld hugsjóna, uppfinninga, lygilegra tækniframfara, stórfenglegra menningarafreka og áður óþekktra lífsgæða, en einsog til að vega upp á móti því var hún líka öld mestu grimmdarverka sem sögur fara af, öld glundroða, byltinga, múgmorða, siðleysis og örbirgðar. Við aldarlok voru jarðarbúar þrefalt fleiri en hundrað árum fyrr, þráttfyrir mannfall í styrjöldum, sem átti sér engin fordæmi, þrælskipulögð þjóðarmorð og víðtækar hungursneyðir. Sem gæti bent til þess, að niðjar Adams séu nánast ódrepandi!
Endalaust má deila um hvaða einstaklingar hafi helst mótað tíðarandann eða skilið eftir sig varanlegust spor til góðs eða ills.
Sigurður A. Magnússon hefur í þessu riti valið tuttugu einstaklinga og einum betur, sem hann telur að haft hafi veruleg áhrif til góðs eða ills á framvindu stjórnmála í veröldinni á liðinni öld, þó ekki hafi þeir allir farið með formleg völd. Einsog hann tekur fram í inngangi, er valið hvorki einhlítt né tæmandi. Kannski mætti á sömu forsendum velja aðra tvo tugi manna sem haft hafa jafnlangdræg og varanleg áhrif á kjör mannkyns með framlagi sínu á öðrum sviðum en vettvangi stjórnmálanna.
