Um bókina
Þvottadagur er síðasti kafli þríleiks sem hófst með Leiðarvísi um þorp og hélt áfram í Stórum olíuskipum. Bókin lýsir ferðalagi milli þorps og borgar, drauma og veruleika, bernskuminninga og ástarsambanda, og meðal viðfangsefna má nefna dekkjaverkstæði, sorphirðu Reykjavíkurborgar og Michael Jordan. Ferðast er um innri og ytri veruleika í átt að áfangastað og umhverfið dregið upp með sterkum myndum.
Úr Þvottadegi
þvottadagur og garðurinn beint upp úr ævintýri:
glitrandi hvít skikkja eða dauður ísbjörn
inni er glamur í uppvaski og nötrandi plastbrúsi
að hrapa fram af þvottavélinni
að tæma óhreinatauið er jafn svalandi og að kreista bólu
og það er ótrúleg nautn
að sitja við eldhúsborðið og krota
með kúlupenna á gluggaumslag
inni í augunum eru fljótandi þræðir
sem birtast þegar ég stari á blaðið
en flýja pennann þegar ég reyni að teikna þá
ég horfi út
þræðirnir eru líka þar
ég fæ störu og hugsa um eitthvað annað
á snúru úti á svölum eru frosnar buxur
eins og maður hogginn í tvennt