Um bókina
Margrét Lóa hlaut bókmenntaverðlaun Tómasar Guðmundssonar 2024 fyrir bókina.
Umsögn dómnefndar í heild sinni:
Ljóðmælandi situr á útikaffihúsi og hugsar um lífið og tilveruna. Minningar leita á hana; minningar um látna ástvini, ljúfsár augnablik úr æsku og ferðalög á fjarlægar slóðir. Úr þessum minningum verður til ljóðrænt vitundarstreymi sem er í senn kjarnyrt og margrætt.
Pólstjarnan fylgir okkur heim er vandað og vel uppbyggt handrit með skýrum boga. Um er að ræða samfellda frásögn sem skiptist í mörg stutt, ónefnd ljóð sem saman mynda samhljóm er minnir á sinfóníu eða óhlutbundið kvikmyndaverk. Ljóðmálið er tært og grípandi og í gegnum handritið má finna magnaðar ljóðmyndir sem sitja lengi í huga lesanda að lestri loknum.
Höfundur fetar fimlega einstigið á milli hins pólitíska og persónulega, án þess þó að vera prédikandi og þrátt fyrir að hér sé ort um flóttafólk, stríð og dauða þá liggur í gegnum handritið þráður vonar sem er ekki bara viðeigandi fyrir þá tíma sem við lifum, heldur ef til vill nauðsynlegur. Táknmynd handritsins er Pólstjarnan, leiðarstjarnan sem í aldanna rás hefur vísað mannkyninu veginn um ókunn höf og lönd.
Á sama hátt og Pólstjarnan vísaði sæförum veginn á öldum áður, vísar hún lesendum veginn í gegnum handrit sem við fyrstu sýn virðist ólínulegt en er þó jafn víðáttumikið og kunnuglegt og stjörnuhiminninn.
Pólstjarnan fylgir okkur heim er magnaður ljóðaseiður um lífið, dauðann, tímann innra með okkur og veraldarundrið vonina.
Úr bókinni
vindurinn flettir
minnisbók
dúfur narta
í brauðmylsnu
ég hugsa um svartamyrkur og brim
og sólskinið heima sem við fáum
aldrei nóg af
mamma mín hringir í mig í draumi
tveimur dögum eftir andlátið
- þegar þú deyrð þá bæði sérðu
og heyrir allt sem gerist
segir hún
mér verður ekki um sel
því í draumnum veit ég
- að hún er farin
íklæðist skuggum
á sólríkum degi
hoppa milli þúfna
renn saman við sandöldur
með tígrismynstri
- af einsemd minni
er hunangsbragð
