Um bókina
Tíminn á leiðinni er ellefta ljóðabók höfuðskáldsins Steinunnar Sigurðardóttur. Meginstef hennar er tíminn sjálfur, ýmist gjöfull eða grimmur; kynslóðir sem koma og fara, árstíðir, upphaf og endalok – horft er bæði inn á við og út í heiminn, á náttúruna, lífið sjálft.
Úr bókinni
Um yfirburði tímans og fleira
Dauðinn er það sem hann er.
Að því leyti áreiðanlegri viðskiptis en tíminn
sem er svo makalaust óáþreifanlegur að það sést ekki einu sinni
hvort hann ferðast í hring, út á hlið, eða hreinlega afturábak.
og enginn veit heldur hvaðan hann kemur eða hvert hann fer.
- -
Þrátt fyrir óbilandi áreiðanleika dauðans
er það án vafa svikull tíminn sem ræður ferðinni
og dauðinn er hans auðmjúkur þjónn
sem villir á sér heimildir í gervi lestarstjórans.
- -
Þótt dauðinn sé þræll tímans
breytir það því ekki að hann er verkfræðingur andskotans.
Hvort sem hann nálgast viðskiptavininn í sadistalíki
með langvarandi og hugmyndaríkum pyntingum
eða hann kemur með fallöxina á hjólum
meðan þú sefur fast.
Svo verklaginn að þú rumskar ekki
þegar hann færir höfuðið á þér út fyrir rúmstokkinn.
Svo snöggur að þú nemur ekki hvininn
og hefur aldrei hugmynd um að af er höfuðið.
