Um bókina
Tvíburarnir Inga og Baldur eru komnir í sumarfrí. Á dagskránni er að drekka kókómalt, glápa á teiknimyndir og slappa af með tilþrifum. Fyrirætlanir þeirra virðast ætla að fjúka út í veður og vind þegar Albert, nágranni þeirra af efstu hæðinni, birtist óvænt í heimsókn hjá þeim. Honum er augljóslega mikið niðri fyrir. Systkinin hafa enga þolinmæði gagnvart þessari hindrun í vegi þeirra en eftir því sem Albert segir þeim meira frá vandamáli, sem hann stendur frammi fyrir, er forvitni þeirra vakin.
Í þessari bók, sem segir frá ólíklegri vináttu, liggur leiðin allt frá blokkaríbúð í Reykjavík til Ísafjarðar, Alpanna, Guatemala, Glimmerfjalla og síðast en ekki síst – til Grísafjarðar!
Grísafjörður er fyrsta barnabók Lóu Hlínar Hjálmtýsdóttur sem einnig myndlýsir söguna.
Úr bókinni
Veggirnir á stigaganginum frá fyrstu til sjöundu hæðar eru hvítir, það eru engar myndir á veggjunum og snjáð teppið er dökkblátt. Ingu líður eins og hún sé alltaf að klifra upp á sömu hæðina en þegar hún er loksins komin fram hjá sjöundu hæðinni og á leiðinni upp á þá áttundu gerast undur og stórmerki. Það er líkt og hún sé komin í allt annað hús. Í stað bláa slitna gólfteppisins er teppið nú dökkrautt og þykkt með gylltum þráðum. Á gólfinu standa risastórir, koparlitaðir blómapottar fullir af bústnum pottaplöntum og veggirnir eru fóðraðir með skrýtnu veggfóðri með upphleyptu mynstri.
(s. 40-42)
