Fyrsta ljóðabók Ingunnar.
Úr Á heitu malbiki:
Halló
Mig langar að yrkja ykkur ljóð
úr öllum fallegustu orðunum sem ég þekki
í því eiga að vera
túlípanar
fiðrildi
brönugrös
kotasæla
stjörnuhrap
vængjasláttur
svefnþungi
skellibjöllur
maríutásur
Ég sé ekki fyrir mér
í fljótu bragði
um hvað slíkt ljóð gæti fjallað
Regnbogaljóð
Í mildri blámóðu á heitu sumarkvöldi
brostir þú við mér mjúkum rauðum vörum
Gullin hárin á handleggjum þínum gældu við
uppbrettar peysuermar þegar við gengum í döggvotu
grasinu
Þrá
Mig dreymir
dúnmjúkar mýrar
mosgrónar heiðar
Beljandi fljót og
gráir melar
yrkja mér ljóð
Þar vil ég hvílast
um stund
heima
