Björk Bjarkadóttir

Björk Bjarkadóttir er fædd í Reykjavík árið 1971. Hún útskrifaðist með stúdentspróf af tungumálabraut frá Menntaskólanum í Hamrahlíð árið 1991, nam við Konst och Hantverksskolan í Gautaborg í skiptinámi árið 1996 og lauk meistaraprófi í Communication visuelle (sem rúmar grafíska hönnun, ljósmyndun og myndskreytingu) frá ESAG Penninghen í París árið 1997.

Björk sendi frá sér sína fyrstu bók árið 1999, barnabókina Gíri Stýri og skrýtni draumurinn, sem fjallar um gíraffann og strætóbílstjórann Gírmund. Gíri Stýri og veislan fylgdi í kjölfarið árið 2001 og á árunum 2003-11 bættust einar ellefu barnabækur við, þar sem Björk samdi bæði texta og myndir. Þar á meðal er bókin Amma fer í sumarfrí en fyrir hana fékk Björk Dimmalimm – íslensku myndskreytiverðlaunin árið 2006. Sama ár hlaut hún vorvindaviðurkenningu IBBY á Íslandi fyrir framlag sitt til barnabókmennta.

Hún hefur einnig myndskreytt fjölda bóka annarra barnabókahöfunda, þar á meðal Skrímslið litla systir mín (2013) eftir Helgu Arnalds og Kroppurinn er kraftaverk (2014) eftir Sigrúnu Daníelsdóttur. Þá hefur hún sýnt málverk, ljósmyndir og myndskreytingar á sýningum á Íslandi, í Noregi, Svíþjóð, Danmörku, Færeyjum, Ítalíu og Bandaríkjunum, og stýrt vinnustofum í tengslum við útgáfur bóka sinna. Þýðingar á bókum Bjarkar hafa komið út í Noregi, Færeyjum, Austurríki og Egyptalandi.

Björk býr í Osló.