Um bókina
Koma jól? Er jólaljóðabók eftir Hallgrím Helgason og Rán Flygenring sem kveðst á við fræga bók Jóhannesar úr Kötlum, Jólin koma. Hér er að finna nýjustu fréttir af Grýlu og Jólakettinum og þá stíga hinar jökulhressu Grýludætur, systur jólasveinanna, fram úr þúsund ára löngum skugga bræðra sinna og arka til byggða, hver með sínu lagi og hrekkjabrögð í farteskinu: Bjalla, Grýlurós, Litla ljós, Fantasía, Stelpustoð, Töskubuska, Bokka, Tertuglöð, Fiturönd, Augasteinastara, Áttavillt, Svangatöng og Kortasníkja.
Kvæðin heita Koma jól?, Skógjafatíð, Jólasystur, Grýlukvæði, Grýluvísa, Jólakötturinn og Íslandsjól.
Myndir bókarinnar eru ristar í dúk.
Úr bókinni
Koma jól?
Jólin koma. Koma jól?
Kviknar ljós í hjarta?
Verður heilagt? Hækkar sól?
Mun hátíð gleði skarta?
Færum heimi friðaróð,
fögnum hvíld frá önnum.
Í brjósti finnum birtusjóð
og berum öllum mönnum.
Allir muna ár og síð
æskujólin heima.
Verum góð við börnin blíð,
þau blessun aldrei gleyma.
Þá verða eins og vera ber,
um veturlangar stundir
við barn í jötu, barn í þér,
bestir endurfundir.
Klukkur hljóma, koma jól,
kviknar ljós í hjarta.
Einni mun þá innri sól
allur heimur skarta
