Smáprósar eftir Braga og myndir eftir Einar Örn Benediktsson.
Úr Mátunarklefinn og aðrar myndir
SKULDIR HEIMILANNA
Á meðan móðirin og faðirinn fjarlægðust húsið með barn sitt í vagninum héldu skuldir heimilisins áfram að vaxa. Þær urðu fjögur hundruð krónur, fjögur þúsund krónur, fimm þúsund krónur, átta hundruð og fimmtíu þúsund. Framundan þenna dag var göngutúr í nágrenni tjarnarinnar, innlit í nýlenduvöruverslun í Þingholtunum og tvö samliggjandi orð sem barninu í vagninum tókst að setja saman algerlega óvænt þegar inn á heimilið var komið, eitthvað um að fugl hefði vængi en veiðihár væru það sem greindi köttinn frá öðrum dýrum sem flæktust um götur borgarinnar. Þetta með orðin gerðist, eins og fyrr segir, að lokinni la promenade, eins og faðirinn var vanur að kalla göngutúra fjölskyldunnar.
(28)
