Einleikur á regnboga

Höfundur: Steinunn Ásmundsdóttir
Útgefandi: Almenna bókafélagið
Staður: Reykjavík
Ár: 1989
Flokkur: Ljóð

Um bókina

Einleikur á regnboga er fyrsta ljóðabók Steinunnar Ásmundsdóttur, skrifuð þegar hún var tuttugu og þriggja ára gömul. Bókin er sprottin upp úr reynslu Steinunnar af dekkri hliðum lífsins. Bókin lýsir í heild ákveðnu þroskaferli sem vísar til bjartari tíma.

Úr bókinni

Grár dagur

Vindurinn blæs
í andlit,
gráleit híma þau
við veggi
gleymskunnar.
Húskumbaldar
skekjast til,
hljóða þreytulega
undan fargi áranna
- fólksins
sem vindbarið
er sífellt
á undanhaldi.

Mynd

Þungar hugsanir
lögðu blómsveig haturs
um höfuð hennar.

Var ekki óbærileikinn
svo léttur
allt til enda víðáttunnar
og fram af hengiflugi
sannleikans?

Kvölddagskrá til morguns

Er þá rétt að hugsa yfirleitt
um skráargöt hugans?
Lykill horfinn
og vitavonlaust
að sjá inn með aðeins öðru auganu.

Góðan dag!
Tíminn er ómælanlegur,
við hefjum dagskrána
með nýjum lykli:
Opnið
og gjörið svo vel að ganga innfyrir.

Mánudagsmorgunn

Regnið fellur lóðrétt
á svartar gangstéttir
og ilmur gróðursins
lokast inni
í þungum dropunum,
hrapandi á regnhlífar
borgarinnar.
Vitundin mýkist
í gráleitum morgninum
gáruðum vorpollum

rauði gossjálfsalinn
brosir kátur til mín
utan frá götunni.

Fleira eftir sama höfund

Hús á heiðinni – ljóð frá Þingvöllum

Á vatnsbakkanum / maður með veiðistöng / og reynir af alefli / að fanga friðsældina.

Lesa meira

Dísyrði

og guðirnir búa á tindinum / jötnar við ræturnar.

Lesa meira

Hin blíða angist – ljóð frá Mexíkó

Ég hef ekki heyrt frá Elsu síðan / og var sagt af þarlendum yfirvöldum / að hún hljóti að vera hugarburður. / Enga konu með þessu nafni / sé nokkurs staðar að finna.

Lesa meira

Áratök tímans

Sjö mínarettur bláu moskunnar / hafa vakað yfir bænum fólks / í fjögur hundruð ár..

Lesa meira

Fuglamjólk

í húsinu var reimt / en líka alúð og kærleikur / ungæðislegur galsi / við elduðum dýrðlegar máltíðir / sungum margraddað / ljóð Huldu við eldhúsborðið / gáfum fósturkrummanum / gammeldansk úr teskeið / sváfum vært við ugluvæl af heiðinni / söng stelksins á snúrustaurnum / gogg krumma í morgunsárið á rúðuna. .

Lesa meira

Í senn dropi og haf

Seint um nóttina hjólaði ég heim / gegnum skógana / drukkin af hamingju / og óhaminni orku / heldur of hratt / og smádýr á veginum / áttu fótum fjör að launa.

Lesa meira

Ástarsaga

Það varð að segjast að litlu, syfjuðu Reykjavík veitti ekki af smávegis innblæstri og upptakti til að lifna aðeins við og fá fólk út á göturnar þetta haustið. Vinirnir töluðu um hversu hressandi það væri í rauninni, og hreinlega frelsandi, að heyra önnur tungumál og sjá fleiri hörundsliti. Öryggiskröfurnar væru þó algjörlega bilaðar og skrítið og jafnvel ógnvekjandi að sjá allan þann öryggisviðbúnað sem smám saman var að taka á sig mynd í Borgartúninu og alls staðar þar sem Reagan og Gorbatsjev myndu fara um komandi helgi. Um stund hefði mátt halda að Reykjavík væri á pari við gamalgrónar evrópskar heimsborgir.

Lesa meira

Manneskjusaga

Saga íslenskrar stúlku frá vöggu til grafar á síðari hluta tuttugustu aldar og í byrjun þeirrar tuttugustu og fyrstu. Í samtíma hennar var enginn skilningur á þeim ósköpum sem hún gekk í gegnum, allt var þagað í hel. Ef til vill var hún ögn á einhverfurófi og stöðugt á skjön við veröld sem var.

Lesa meira