Ég frábið mér flatkökur með hangikjöti
Þegar ég dey
reynið að vera mér ekki til skammar
Ég vil huggulega erfidrykkju
á föstudegi
þar sem boðið verður upp á hvítvín
Ykkur mun ekkert veita af því
Minningargreinarnar
skulu vera hispurslausar
þannig að það jaðri við að vera óþægilegt
Segið frá brestum mínum
Segið frá því að ég hafi mætt dauðanum
hrædd
og hnípin
Þá les þetta kannski einhver
Dragið upp mynd af manneskju
Látið vera að nefna allar kvenlegar dyggðir
Mér stendur á sama um það hver stýrir athöfninni
en geri algjöra kröfu
um að viðkomandi flytji engar gamanvísur frá eigin brjósti
Líkmennirnir
skulu taka kistuna upp á öxl
Hlýðið mér í þessu
Útfararstjórinn mun múðra um að það tíðkist ekki lengur
fakku ukka ap verklagsreglum heilbrigðiseftirlitsins
og leiðbeiningum bæði sjúkra- og iðjuþjálfa
Hafið þetta að engu
Myndin mun sitja í hugskoti viðstaddra
lengur en það tekur að ráða niðurlögum vöðvabólgu
Reynið bara
að verða mér ekki til skammar
þegar ég dey
(s. 52-52)
