Evana Kisa myndlýsti. Bókin er prentuð með letrinu Dyslexie sem auðveldar lesblindum að lesa.
Um bókina
Þín eigin saga – Búkolla fjallar um snjalla kú, beljandi fljót, óðar skessur, brjálað naut, logandi bál, stærðarinnar bor – og ÞIG.
ÞVÍ ÞÚ RÆÐUR HVAÐ GERIST!
Mundu bara að ef sagan endar illa má alltaf reyna aftur – það eru meira en tíu mismunandi sögulok!
Úr bókinni
Þú ákveður að flýja ekki. Sem þýðir að þú ert algjör hetja.
Suðið í bornum verður hærra.
Og hærra!
Allt í einu heyrist hátt brothljóð. Eins og einhver hafi brotið gulrót. Þetta er fjallið að brotna í tvennt.
"Ó, nei!" hvíslar Karlsson. "Ég er svo þreyttur. Ég get ekki hlaupið lengra."
Þú gengur að sprungunni.
Þú gægist í gegn.
Þú sérð skessurnar.
Skessurnar sjá þig!
Um leið öskra þær.
Öskrin bergmlála eftir sprungunni. Sprungan er ekki nógu breið fyrir skessurnar en ef þær halda áfram að bora munu þær komast í gegn.
Þú verður að troða einhverju í sprunguna til að stoppa þær!
HVAÐ ÆTLAR ÞÚ AÐ GERA?
Ef þú vilt reyna að troða þér inn í sprunguna skaltu fletta á blaðsíðu 44.
Ef þú vilt reyna að fá skessurnar til að troða sér í sprunguna skaltu fletta á blaðsíðu 57.
(s. 39-40)
