William Saroyan: Sögur úr bókinni The daring young man on the flying trapeze.
Úr Kæra Greta Garbo og aðrar sögur:
SLANGA
Á göngu sinni um garðinn í maí sá hann litla brúna slöngu skjótast burt milli laufblaðanna í grasinu, og hann elti hana með langa trjágrein og um leið skynjaði hann meðfæddan ótta mannsins við skriðdýr.
Einmitt, hugsaði hann, tákn illskunnar, og hann snerti slönguna með greininni svo hún hnipraði sig saman. Slangan lyfti höfðinu og hjó í greinina, skaust svo dauðskelfd gegnum grasið og hann á eftir.
Slangan var einstaklega falleg og ótrúlega klók og hann ákvað að fylgja henni eftir dálitla stund til að forvitnast um hana.
Litla brúna slangan dró hann með sér langt inn í garðinn þar til hann hvarf úr augsýn og var einn með henni. Það hvarflaði að honum að hann væri að brjóta eitthvert lögmál með því að veita slöngunni eftirför og í huganum undirbjó hann skýringu ef einhver skyldi rekast á hann. Ég er nemandi í nútíma siðfræði, datt honum í hug að segja, ég er myndhöggvari og ég er að kanna líkamsbyggingu snáka. Að minnsta kosti mundi hann hafa einhverja skýringu á reiðum höndum.
Hann mundi ekki láta það uppi að hann ætlaði að drepa slönguna.
(s. 31-32)
