Drauma-Dísa

Höfundur: Gunnar Theodór Eggertsson
Útgefandi: Vaka-Helgafell
Staður: Reykjavík
Ár: 2020
Flokkur: Ungmennabækur

Um bókina

Vár og vinir hennar hittast á furðusagnahátíð í útlöndum til að sjá átrúnaðargoðið sitt, Björn Kráksson, hinn dularfulla höfund bókaflokksins um Dísu. En Björn veldur þeim vonbrigðum og hverfur síðan sporlaust. Eftir það er engu líkara en að sögusvið bókaflokksins, með skrímslum sínum og furðum, sé byrjað að renna saman við raunveruleikann …

Drauma-Dísa er þriðja bók Gunnars Theodórs Eggertssonar um stelpuna sem eitt sinn var venjulegur unglingur í Reykjavík, gufaði svo upp eftir ævintýralegan bardaga í fjarlægu landi en lifir í gegnum bækur Björns, vinar síns úr fortíðinni.

Úr bókinni

Skjaldmærin lá kyrr í sandinum stundarkorn og beið þess að sjá hreyfingu í náttmyrkrinu. Eitthvað hafði komið aftan að henni, ofurhratt, þögult og risavaxið, en hún sýndi leifturviðbrögð, henti sér yfir sandölduna og komst í öruggt skjól. Hún stökk umsvifalaust aftur á fætur með báðar axir á lofti, reiðubúin að glíma við hvern þann djöful sem myrkrið kunni að geyma, en greip í tómt.
Hafði hún ímyndað sér árásina?
Varla gat annað verið, því engin þeirra ófreskja sem enn drógu andann á deyjandi plánetunni gat komið skjaldmeynni að óvörum. Og þó, kannski var um óþekkta ógn að ræða og þá skipti öllu máli að kynnast henni, svo hægt væri að hafa hemil á henni, yfirbuga hana og að lokum búta niður. Hún ákveð að skoða sig nánar um, leita að vegsummerkjum, þótt ekki væri nema til að fullvissa sjálfa sig um að hún væri ekki farin að sjá grýlur. Langur dagur var að baki, axirnar höfðu gleypt heilmikið Dermítablóð á ferðalaginu og hetjan var þreytt eftir erfiða göngu heim til hallarinnar. En þótt líkaminn væri illa haldinn og þörf væri á góðri hvíld í hallarkerjunum hafði hugurinn aldrei brugðist henni.
Unga konan steig varlega upp á sandölduna, dustaði skítinn af beinabrynjunni og virti eyðimörkina vökul fyrir sér. Tunglið brann á biksvörtum himninum og djúprauðir geislar rísandi sólar brutust brotakenndir í gegnum sótugt loftið. Mærin dró smágerðan kyndil úr stáli upp úr bakpoka sínum og nuddaði hvítan kristal á toppi hans. Bláleitur bjarmi kviknaði og hrakti myrkrið hæfilega langt frá svo hún gat virt umhverfið betur fyrir sér og ákallað innri kraft til að leita eftir lífi á annars líflausu landinu. Og viti menn, eitthvað dró andann steinsnar í austurátt.

(s. 55-56)

Fleira eftir sama höfund

Köttum til varnar

Lesa meira

Sláturtíð

Kvikmyndagerðarmaðurinn Ásbjörn Axel tekur að sér að hafa uppi á íslenskri baráttukonu fyrir réttindum dýra sem ekkert hefur spurst til síðan hún sat í fangelsi í Hollandi fyrir skemmdarverk. Leitin leiðir hann á vafasamar slóðir í litríkum félagsskap dýraréttindasinna í Evrópu og smám saman missir hann tökin bæði á verkefninu og sjálfum sér.. .

Lesa meira

Steindýrin

Hvernig getur hundur breyst í styttu? Það er eitthvað meira en lítið dularfullt. En þannig byrjar þessi saga. Hringur, hundurinn hans Úlfs gamla, breyttist í styttu og um leið lét allt fullorðna fólkið í þorpinu okkar eins og hann hefði aldrei verið til. . .

Lesa meira

Steinskrípin: hryllingsævintýri

Daginn sem Bergur vaknar skyndilega til lífsins skín gamalkunnug sólin hátt á lofti en annað er framandi. Veröldin er grá og líflaus og þar ráða steinskrípin ríkjum – hrikalegar ófreskjur með slímuga arma og flugbeittar klær. Bergur er þó ekki einn í heiminum.. .

Lesa meira

Vatnið brennur

Raftónlistarkonan og ólíkindatólið Gríma er komin austur í Neskaupstað til að spila á Eistnaflugi, þótt hún eigi litla samleið með málmhausum og láti flest sem viðkemur hátíðinni fara í taugarnar á sér. En ferðin reynist vendipunktur í lífi Grímu því þar kemst hún í kynni við gamla, sænska þjóðlagaplötu sem tengist dularfullu og ógeðfelldu morðmáli snemma á áttunda áratugnum. Og fyrr en varir hefur ævaforn lagstúfur náð yfirnáttúrulegum tökum á tónlistarkonunni.

Lesa meira

Furðufjall : Nornaseiður

Nornaseiður er fyrsta bókin í splunkunýrriævintýraseríu fyrir börn og unglinga. Sagan er ríkulega myndskreytt.. . Íma er ósátt við lífið. Öll leiðinlegustu skyldustörfin á eyjunni lenda á henni á meðan systir hennar fær að nema galdur hjá nornunum! Andreas lærir járnsmíðar af pabba sínum á meginlandinu en dreymir um að verða riddari og vinna hetjudáðir. En örlögin hafa ætlað þeim báðum annað og brátt verða óvæntir og skelfilegir atburðir sem setja tilveru þeirra gjörsamlega í uppnám.. .

Lesa meira

Furðufjall : Næturfrost

Næturfrost er önnur bókin í ríkulega myndskreyttri ævintýraseríu fyrir börn og unglinga. Þetta bindi hefst á því að Andreas og föruneyti hans hafa numið land á Hulinseyju. Álfarnir taka vel á móti þeim þótt þeir haldi þó ákveðinni fjarlægð. Íma glímir við nornanámið og kemst á snoðir um hræðilegt leyndarmál sem falið er í fjallinu. En skuggahliðar eyjunnar koma þó fyrst í ljós þegar nóttin skellur á.

Lesa meira

Furðufjall : Stjörnuljós

Álfastúlkan Íma situr fangin ofan í gömlum hallarrústum þegar hvítur köttur birtist skyndilega og leiðir hana djúpt inn í iður fjallsins. Andreasi er rænt af álfunum en verra er þó að erkióvinur hans, prinsinn, hefur fundið Hulinseyju og hyggur á hefndir. Framtíð eyjunnar er því í höndum Ímu og Andreasar, sem þurfa að ljúka upp leyndardómum fjallsins og sameina íbúana gegn óvinunum.

Lesa meira

Galdra-Dísa

Púkinn ásótti Dísu í draumum alla nóttina. Atvikið í tónleikasalnum hafði djúp áhrif á ungu konuna og henni leið einhvern veginn eins og hún hefði óvart kallað djöfulinn til sín, meðvitað eða ómeðvitað. Ef þetta var þá djöfull.

Lesa meira