Furðufjall : Næturfrost

Höfundur: Gunnar Theodór Eggertsson
Útgefandi: Vaka-Helgafell
Staður: Reykjavík
Ár: 2022
Flokkur: Unglingabækur,; Barnabækur

Fífa Finnsdóttir myndskreytti

Um bókina

Næturfrost er önnur bókin í ríkulega myndskreyttri ævintýraseríu fyrir börn og unglinga. Þetta bindi hefst á því að Andreas og föruneyti hans hafa numið land á Hulinseyju. Álfarnir taka vel á móti þeim þótt þeir haldi þó ákveðinni fjarlægð. Íma glímir við nornanámið og kemst á snoðir um hræðilegt leyndarmál sem falið er í fjallinu. En skuggahliðar eyjunnar koma þó fyrst í ljós þegar nóttin skellur á.

Úr bókinni

Fremsti hermaðurinn kallaði eitthvað yfir hópinn og nú var hestunum hleypt á fulla ferð áfram. Hófarnir þyrluðu upp sandi á ströndinni og skildu eftir sig langt rykský. Ég sá eitthvað bærast á bak við hestana, verur sem ég hafði ekki tekið eftir áður vegna þess að þær riðu ekki heldur gengu tvær og tvær saman í rólegheitum. Fuglarnir úr borginni voru mættir og sveimuðu nú yfir þessum furðuverum. Þær voru svartklæddir blendingar af mannverum og dýrum, með selshöfuð, refshöfuð, rjúpuhöfuð og ein leit út eins og lifandi hauskúpa af dauðum hesti! Mér stóð stuggur af þeim en gat ekki hugsað meira um það vegna þess að nú voru hermennirnir komnir alla leið að björgunum og þeir námu staðar rétt fyrir framan tjaldbúðirnar okkar. Þar stóð Hlóðmar fremstur í flokki en restin af hópnum í hæfilegri fjarlægð. Við hin tróndum yfir öllum eins og foringjar á fremsta bjarginu og ég fylgdist með hálffalinn á milli mömmu og pabba.
Ég taldi tuttugu manns á hestum, átta fótgönguliða og sex dýrslegar furðuverur sem höfðu stillt sér upp aftast. Hestarnir voru öðruvísi en hestarnir heima. Þeir skörtuðu sömu biksvörtu og drungalegu augunum og fuglarnir og voru í öðrum hlutföllum en ég hafði vanist. Leggirnir lengri en á reiðskjótunum í þorpinu okkar, trýnin breiðari og á milli eyrnanna leyndust smágerð og snúin horn. Húðin minnti frekar á sjávardýr heldur en húsdýr og faxið og taglið héngu niður í skrautlegum drönglum. Frostfólkið var með sömu skrítnu augun, djúp og dimm eins og kolamolar í skjannahvítum, nánast glærum ásjónum. Voru þetta kannski afturgöngur þeirra sem eitt sinn byggðu gömlu borgina?

(s. 69-70)

Fleira eftir sama höfund

Köttum til varnar

Lesa meira

Steinskrípin: hryllingsævintýri

Daginn sem Bergur vaknar skyndilega til lífsins skín gamalkunnug sólin hátt á lofti en annað er framandi. Veröldin er grá og líflaus og þar ráða steinskrípin ríkjum – hrikalegar ófreskjur með slímuga arma og flugbeittar klær. Bergur er þó ekki einn í heiminum.. .

Lesa meira

Vatnið brennur

Raftónlistarkonan og ólíkindatólið Gríma er komin austur í Neskaupstað til að spila á Eistnaflugi, þótt hún eigi litla samleið með málmhausum og láti flest sem viðkemur hátíðinni fara í taugarnar á sér. En ferðin reynist vendipunktur í lífi Grímu því þar kemst hún í kynni við gamla, sænska þjóðlagaplötu sem tengist dularfullu og ógeðfelldu morðmáli snemma á áttunda áratugnum. Og fyrr en varir hefur ævaforn lagstúfur náð yfirnáttúrulegum tökum á tónlistarkonunni.

Lesa meira

Galdra-Dísa

Púkinn ásótti Dísu í draumum alla nóttina. Atvikið í tónleikasalnum hafði djúp áhrif á ungu konuna og henni leið einhvern veginn eins og hún hefði óvart kallað djöfulinn til sín, meðvitað eða ómeðvitað. Ef þetta var þá djöfull.

Lesa meira

Drauga-Dísa

Þegar allt fer í háaloft á milli Dísu og vinsældaklíkunnar í níunda bekk flýr hún upp í sveit með foreldrum sínum. Þrjú hundruð árum fyrr situr strákur í sama dal og bíður þess að ófreskja skríði úr eggi. Hvorugt þeirra veit að brátt munu þau hittast og setja af stað atburðarás sem slær við öllum skrímslasögum sem heimurinn hefur þekkt til þessa.. .

Lesa meira

Furðufjall : Nornaseiður

Nornaseiður er fyrsta bókin í splunkunýrriævintýraseríu fyrir börn og unglinga. Sagan er ríkulega myndskreytt.. . Íma er ósátt við lífið. Öll leiðinlegustu skyldustörfin á eyjunni lenda á henni á meðan systir hennar fær að nema galdur hjá nornunum! Andreas lærir járnsmíðar af pabba sínum á meginlandinu en dreymir um að verða riddari og vinna hetjudáðir. En örlögin hafa ætlað þeim báðum annað og brátt verða óvæntir og skelfilegir atburðir sem setja tilveru þeirra gjörsamlega í uppnám.. .

Lesa meira

Drauma-Dísa

Drauma-Dísa er þriðja bók Gunnars Theodórs Eggertssonar um stelpuna sem eitt sinn var venjulegur unglingur í Reykjavík, gufaði svo upp eftir ævintýralegan bardaga í fjarlægu landi en lifir í gegnum bækur Björns, vinar síns úr fortíðinni.

Lesa meira

Furðufjall : Stjörnuljós

Álfastúlkan Íma situr fangin ofan í gömlum hallarrústum þegar hvítur köttur birtist skyndilega og leiðir hana djúpt inn í iður fjallsins. Andreasi er rænt af álfunum en verra er þó að erkióvinur hans, prinsinn, hefur fundið Hulinseyju og hyggur á hefndir. Framtíð eyjunnar er því í höndum Ímu og Andreasar, sem þurfa að ljúka upp leyndardómum fjallsins og sameina íbúana gegn óvinunum.

Lesa meira

Sláturtíð

Kvikmyndagerðarmaðurinn Ásbjörn Axel tekur að sér að hafa uppi á íslenskri baráttukonu fyrir réttindum dýra sem ekkert hefur spurst til síðan hún sat í fangelsi í Hollandi fyrir skemmdarverk. Leitin leiðir hann á vafasamar slóðir í litríkum félagsskap dýraréttindasinna í Evrópu og smám saman missir hann tökin bæði á verkefninu og sjálfum sér.. .

Lesa meira