Sláturtíð

Höfundur: Gunnar Theodór Eggertsson
Útgefandi: Vaka-Helgafell
Staður: Reykjavík
Ár: 2019
Flokkur: Skáldsögur

Um bókina

Kvikmyndagerðarmaðurinn Ásbjörn Axel tekur að sér að hafa uppi á íslenskri baráttukonu fyrir réttindum dýra sem ekkert hefur spurst til síðan hún sat í fangelsi í Hollandi fyrir skemmdarverk. Leitin leiðir hann á vafasamar slóðir í litríkum félagsskap dýraréttindasinna í Evrópu og smám saman missir hann tökin bæði á verkefninu og sjálfum sér.

Sláturtíð er ferðasaga sem veltir jafnframt upp ýmsum hliðum á brýnu samfélagsmálefni.

Gunnar Theodór Eggertsson hefur hlotið verðlaun og viðurkenningar fyrir barna-og unglingabækur sínar Steindýrin og Drauga- Dísu en nú er komið að því að hann bjóði fullorðnum lesendum í óvenjulega ævintýra-ferð. Gunnar skrifaði doktorsritgerð sína um bókmenntir og dýrasiðfræði.

Úr bókinni

Hvað vissi Ásbjörn um ketti? var líklega betri spurning, smærri í sniðum og viðráðanlegri. Ásbjörn hafði búið með köttum síðan hann mundi eftir sér og að hluta til skilgreint sjálfan sig út frá því samlífi. Þannig var hann kattamaður en ekki hundamaður, nokkuð sem verðugt var að stæra sig af. Ásbjörn skynjaði hunda sem ósjálfbjarga og undirgefin gæludýr sem þurfti að hafa fyrir eins og litlum börnum á meðan kettir voru meira eins og unglingar, þeir þóttust vera sínir eigin herrar en komu á endanum heim til að éta og sofa. Kettirnir sem Ásbjörn hafði kynnst um ævina voru af öllum stærðum og gerðum og streittust gegn yfirgripsmiklum skilgreiningum en sumt þorði hann þó að alhæfa um. Kettir voru langflestir loðnir. Kettir eru oftast með fjóra fætur og skott. Veiðihár og beittar klær. Þeir fara eigin leiðir, eru næturdýr, fíla að veiða flugur og fugla. Og ef maður kennir ketti að pissa í sandkassa innandyra þá mun hann eflaust pissa í sandkassa úti líka.
En eru gæludýr dýr? Eru húsdýr dýr? Hvað þýðir að vera dýr? Hvers vegna elskum við þessi en ekki hin? Hversvegna notum við hin en ekki þessi? Hver er munurinn á köttum og öðrum loðdýrum? Á vitsmunalífi hunda og svína? Sálarlífi andarunga og kjúklinga? Ásbjörn hafði hingað til álitið sig dýravin vegna þess að hann hafði átti gæludýr - en nei, hann mátti víst ekki segjas "eiga" gæludýr, jafnvel þótt það endurspeglaði lagalega stöðu dýrsins gagnvart samfélaginu. Hann hafði öllu heldur búið með ketti, haft kött sem félaga, átt í ferfættu samlífi. Var það ekki betur orðað?

(s. 17)

Fleira eftir sama höfund

Köttum til varnar

Lesa meira

Steindýrin

Hvernig getur hundur breyst í styttu? Það er eitthvað meira en lítið dularfullt. En þannig byrjar þessi saga. Hringur, hundurinn hans Úlfs gamla, breyttist í styttu og um leið lét allt fullorðna fólkið í þorpinu okkar eins og hann hefði aldrei verið til. . .

Lesa meira

Steinskrípin: hryllingsævintýri

Daginn sem Bergur vaknar skyndilega til lífsins skín gamalkunnug sólin hátt á lofti en annað er framandi. Veröldin er grá og líflaus og þar ráða steinskrípin ríkjum – hrikalegar ófreskjur með slímuga arma og flugbeittar klær. Bergur er þó ekki einn í heiminum.. .

Lesa meira

Vatnið brennur

Raftónlistarkonan og ólíkindatólið Gríma er komin austur í Neskaupstað til að spila á Eistnaflugi, þótt hún eigi litla samleið með málmhausum og láti flest sem viðkemur hátíðinni fara í taugarnar á sér. En ferðin reynist vendipunktur í lífi Grímu því þar kemst hún í kynni við gamla, sænska þjóðlagaplötu sem tengist dularfullu og ógeðfelldu morðmáli snemma á áttunda áratugnum. Og fyrr en varir hefur ævaforn lagstúfur náð yfirnáttúrulegum tökum á tónlistarkonunni.

Lesa meira

Furðufjall : Nornaseiður

Nornaseiður er fyrsta bókin í splunkunýrriævintýraseríu fyrir börn og unglinga. Sagan er ríkulega myndskreytt.. . Íma er ósátt við lífið. Öll leiðinlegustu skyldustörfin á eyjunni lenda á henni á meðan systir hennar fær að nema galdur hjá nornunum! Andreas lærir járnsmíðar af pabba sínum á meginlandinu en dreymir um að verða riddari og vinna hetjudáðir. En örlögin hafa ætlað þeim báðum annað og brátt verða óvæntir og skelfilegir atburðir sem setja tilveru þeirra gjörsamlega í uppnám.. .

Lesa meira

Drauma-Dísa

Drauma-Dísa er þriðja bók Gunnars Theodórs Eggertssonar um stelpuna sem eitt sinn var venjulegur unglingur í Reykjavík, gufaði svo upp eftir ævintýralegan bardaga í fjarlægu landi en lifir í gegnum bækur Björns, vinar síns úr fortíðinni.

Lesa meira

Furðufjall : Næturfrost

Næturfrost er önnur bókin í ríkulega myndskreyttri ævintýraseríu fyrir börn og unglinga. Þetta bindi hefst á því að Andreas og föruneyti hans hafa numið land á Hulinseyju. Álfarnir taka vel á móti þeim þótt þeir haldi þó ákveðinni fjarlægð. Íma glímir við nornanámið og kemst á snoðir um hræðilegt leyndarmál sem falið er í fjallinu. En skuggahliðar eyjunnar koma þó fyrst í ljós þegar nóttin skellur á.

Lesa meira

Furðufjall : Stjörnuljós

Álfastúlkan Íma situr fangin ofan í gömlum hallarrústum þegar hvítur köttur birtist skyndilega og leiðir hana djúpt inn í iður fjallsins. Andreasi er rænt af álfunum en verra er þó að erkióvinur hans, prinsinn, hefur fundið Hulinseyju og hyggur á hefndir. Framtíð eyjunnar er því í höndum Ímu og Andreasar, sem þurfa að ljúka upp leyndardómum fjallsins og sameina íbúana gegn óvinunum.

Lesa meira

Galdra-Dísa

Púkinn ásótti Dísu í draumum alla nóttina. Atvikið í tónleikasalnum hafði djúp áhrif á ungu konuna og henni leið einhvern veginn eins og hún hefði óvart kallað djöfulinn til sín, meðvitað eða ómeðvitað. Ef þetta var þá djöfull.

Lesa meira